Ramón Carredano (Noia, 1950) presenta a súa nova novela QWERTY, editada por Editorial Elvira, e que obtivo o segundo premio no Certame Vilar Ponte na súa edición do ano 2019.
Unha novela de viaxes no tempo sempre e entretida e interesante, é a maneira perfecta de viaxar a través de diferentes períodos históricos sen necesidade de despeiteármonos nin desintegrármonos nos famosos buracos de verme.
Abrindo as páxinas de QWERTY imos atoparnos acompañando os personaxes desta novela de Ramón Carredano nunha pinza temporal moi ambiciosa, dando saltos no tempo entre o século XVIII e un futurible século XXX, grazas a un obxecto que descubriredes adentrándovos nunha lectura moi amena e divertida.
Atreverse coa ciencia ficción e, máis concretamente cos xogos temporais, ten moito de valente, pero é que a Ramón Carredano lle gusta tamén escribir novela histórica e isto nótase nos pequenos detalles de cada unha das épocas que quere mostrarnos. Non hai fallos de raccord nin un só elemento fóra do seu contexto histórico.
Se ti tamén queres converterte nun cronoviaxante para gozar das reviravoltas dunha historia humana e emocionante, QWERTY é a novela que estabas a esperar. Vai engancharte, prometémolo, e vas ter que ler ata a última liña para descubrir todos os seus misterios.
A vistosa cuberta é obra do artista Alfonso Costa e Alejandro Gaudino é o autor das ilustracións do seu interior, que dan un sentido especial á historia, convertendo este libro nun obxecto total, tal e como ocorre con cada edición de Editorial Elvira.
Trátase dunha novela con moito espírito galego, dirixida a todas as persoas interesadas na ciencia ficción desde os 16 ata os 99 anos. Vai chegar ás librarías e á tenda en liña da editorial ao longo do mes de abril e pronto poderemos gozar de presentacións na compaña do autor en diferentes cidades da nosa contorna.
O vindeiro martes, 9 de novembro, imos encher de música en galego o Auditorio Municipal do Concello de Vigo. Coa voz de Alberto Cunha como fío condutor, viaxaremos por eses recordos sonoros que marcaron unha época e que sempre paga a pena volver a visitar.
Acompañado por Andrés Cunha á guitarra e polo artista Ramón Trigo ás acuarelas, Alberto dirixiranos polo libro-disco Escolma aberta, un proxecto cheo de amor á cultura galega. Vai ser un percorrido desde o romanticismo de Rosalía de Castro, ata a nova canción galega da década dos anos setenta, a través de 10 poemas que son 10 cancións míticas nas que se fusionaron importantes figuras do noso eido cultural.
Tendo en conta todos estes compoñentes, atrevémonos a dicir que este acto vai ser moito máis que un concerto. Vai ser a reivindicación de todo o que constrúe a identidade galega: a literatura, a música ou a arte.
A entrada é libre ata completar aforo (que gusto recuperar os bos costumes!), pero terán preferencia as persoas con invitación. Estas invitacións son totalmente de balde e poden recollerse en 5 puntos estratéxicos da cidade:
Editorial Elvira (rúa Santiago, 11)
Libraría Librouro (rúa Eduardo Iglesias, 12)
Libraría Cartabón (rúa de Urzáiz, 125)
Libraría Versus (rúa de Venezuela 80)
Pick-up discos (rúa do Progreso, 14)
Estamos tan contentos pola celebración deste concerto que decidimos activar unha promoción especial para o libro-disco Escolma aberta na nosa tenda en liña: unha rebaixa de 5 euros sobre o seu prezo habitual. Tamén gozaredes deste desconto se comprades Escolma aberta na editorial de maneira presencial. A idea é que todo o mundo que teña interese por asistir a este espectáculo musical veña cos deberes feitos e as letras ben aprendidas.
Estes días estamos mirando polas fiestras das nosas casas máis do habitual; o que vemos é unha cidade fantasmal, case postapocalíptica e lembramos todas esas películas de catástrofes que conforman o noso imaxinario colectivo. Pero vemos tamén persoas sorrir de balcón a balcón, comunidades de veciños organizándose para que non lle falte de nada á señora do quinto que vive sola, e un montón de iniciativas para nos entreter neste confinamento. Por no falar de todo ese persoal sanitario e doutros sectores, que traballan día e noite para tentar devolvernos a degoirada normalidade o antes posible. Todo isto énchenos de esperanza porque así é como conseguiremos superar esta situación: unidos, esperanzados, quedando na casa o maior tempo posible e sendo conscientes de que a vida non volverá ser exactamente igual, porque tenemos moito que revisarnos como sociedade.
A literatura tense convertido na nosa liberdade de movemento durante estes días. E queremos, PRECISAMOS, que se sigan escribindo historias que nos fagan ver a realidade dende outros prismas. Por iso, este ano presentamos o VII Certame de Relatos Vigo Histórico nun contexto complicado e extraordinario: a crise sanitaria do Covid-19.
Todo o equipo de Editorial Elvira ten reflexionado en profundidade sobre a posibilidade de adialo; pero, ao tratarse dunha convocatoria e que non pon en risco ninguna das medidas de distanciamento social que se recomendan dende o goberno, temos decidido seguir adiante coas datas que tiñamos previstas para esta aventura editorial á que temos tanto agarimo. Prescindimos de convocar a rolda de prensa habitual e botámonos a grabar este video para anunciar a posta en marcha da sétima edición do Certame de Relatos Vigo Histórico.
O noso obxectivo principal é dar saída a toda esa paixón literaria que nos rodea, que é moita e, segundo a nosa experiencia en anteriores edicións do certame, de gran calidade. O mundo está enchido de grandes escritores e escritoras e este é o mellor xeito que atopamos para darvos o lugar que vos merecedes.
O centro deste certame é Vigo, sendo fundamental que a nosa cidade teña un papel protagonista nos relatos participantes. E estamos a poñérvolo doado porque se trata dun escenario de granito que ten sido punto de partida para centos de historias. Un lugar no que o olor a mar e a humidade envólveo todo e que flúe a través dunha conciencia colectiva curiosa.
Os prazos son moi parecidos aos de anos anteriores: empeza a recepción de relatos ás 00:00 horas do venres 27 de marzo e acaba ás 23:59 horas do 1 de xullo. A partir dese momento o xurado terá arredor de dous meses e medio para ler os relatos, reunirse e facer as súas valoracións. Notificaranse os relatos gañadores nun acto informativo no mes de setembro e farase a entrega de premios nunha gala cuxa data será fixada a finais deste ano, na que tamén presentaremos Relatos na rúa VII, un libro no que publicaremos os relatos gañadores (primeiro premio, segundo premio e accésits) xunto a unha selección dos relatos que máis gustaron entre o xurado.
Na nosa web podedes acceder ás bases do certame, que estamos seguros de que resolverán calquera dúbida que vos poida xurdir.
Estamos convencidos de que en tempos revoltos a creatividade é a mellor das terapias para tentar xestionar a incerteza (que é moita e en moitos eidos). Así que, dende o noso confinamento, nos temos proposto seguir poñendo en valor eses universos creativos que nestes intres funcionan como inhibidores dunha realidade que supera a calquera ficción que tivésemos podido ler (ou editar).
Queremos aproveitar para presentarvos un novo proxecto paralelo ao Certame de Relatos Vigo Histórico, que xorde a raíz de toda esta situación na que a solidariedade se fai vital. «Lemos convosco» nace do compromiso de devolverlles aos nosos maiores toda esa tradición oral que nos teñen regalado e grazas á que seguen vivas moitas das nosas lendas. En todo este vórtice de noticias, pésanos especialmente a vulnerabilidade deste sector da poboación e queremos aportar o noso pequeno gran de area para coidar do seu benestar. E isto farémolo, en canto a situación de alarma sanitaria permita visitar residencias, visitando centros de día e asociacións, a través do acompañamento e da lectura dos relatos que conforman os diferentes volumes de Relatos na rúa. Esperamos a vosa colaboración neste novo proxecto, no que estamos a traballar e do que vos iremos informando en próximas datas.
