Pontevedra relaciónase dende sempre co comercio, xa hai constancia de que na Idade Media se celebraba na vila unha importante feira franca. De aí en adiante, constituirase no principal porto de mercadorías de Galiza, de tal xeito que o Gremio de Mareantes se converte no epicentro da actividade económica.
Co nomeamento de capitalidade administrativa en 1833, a cidade recupera o esplendor perdido tempo atrás. O derrubo das murallas vai supoñer unha nova planificación urbana acorde ao pulo da economía mercantil e artesanal. Rúas como a de Santa Mariña, prazas coma a da Pedreira ou edificios como a Casa do Arco ou o de Castro Monteagudo son boa proba.
A boa vila no só destacou polo seu comercio, a cidade foi quen de se erguer como capital cultural e política do país galego. Nela viviron persoeiros do talle de Valle–Inclán, Castelao ou Alexandre Bóveda.
No presente, Pontevedra representa a idea dunha cidade que mira cara ao futuro, sen perder de vista as súas tradicións, aposta pola mobilidade peonil, urbanismo verde e respecto co medio ambiente.
Peixiño desnortado conta a experiencia de Eume, unha nena que fai o mercado semanal co seu pai. A rapaza ten que facer un mandado e percorre a parte baixa da zona monumental de Pontevedra. A mirada de Eume describe a vida cotiá. A través do seu maxín, coñece a persoeiros do pasado e do presente que teñen a súa pegada particular nas rúas e prazas do casco histórico.
Alberto Vilaboa Pérez
